6.07.2003

Hiriam Häfeles Kurzkolumne

Kaschbrlesdeadr
uffm Bauredag

"Verärgerte Bauern trieben Ministerin Künast eine Kuh vor die Bühne", war zum Wochenende in den Massenmedien zu erfahren - zusammen mit einem Foto: Zwei verkrampfte Gestalten zerren am Kälberstrick ein ängstliches, harmloses Wesen hinter sich her.

Auf vielfachen Wunsch insbesondere aus Baden eine Übersetzung in den als "Hochdeutsch" titulierten niedersächsischen Dialekt: hier klicken.

H.H.:
Beim Kaschbrlesdeadr woisch joh wenigschdns noh, wer wer isch. Dr Kaschbr isch dr Gude onds Groggodil isch bees. Abbr uff denne Bauredag kenntsch joh dirmelich werre: D Künast schbiehld blezzlich widdr d Griane, drozdem s vohr a baar Dag erschd gäge dia Kirzunge voh de EU-Agrar-Subwäntione gschdimmd hett - graad so wiahs dia gos Agrar-Konzern gern henn.

Uff dr andre Seit schtelle sich älle bleed ond frohged drzu noh "ratlos" wieso dr Preis fiehr d Milch ahnegoht, drozdem dr demmschd Baur wois, daß dr Preis emmer ahnegoht, wenns Ohgebot schdeigt, abbr d Leit net meh vrbrauche kennet. Joh moinet dia denn, dr Läbensmiddlhandl dädene was schenke, wennem d Milch schoh zu de Ohre naus kommd?

Abbr ob sich älle blos bleed schtellet, frogsch de dann au widdr, zmol denne kloine Baure dia sinkende Preis joh äch weh dehn, drweil dia gros Agrar-Induschtrielle, wo au dr Baur schbielet, Dank denne Subwäntione au mit sinknde Preis fättr ond fättr worre sen. Mit denne Subwäntione henn sich d kloine Baure wia mittm Fuddrsack vorm Rissl hendr de Laitbulle härdirigire lasse, drozdem s emmr wenigr ond wenigr fiehr se worre isch ond emmr meh kräpiert sen. Ond dann schempfe se au noh - in ächd oddr blos gschbiehld ? - uff d Künast als obb s in ächd a Griane wär, wo endlich noch fimpf Johr "Rot-Grian" d Subwäntione kirze däd...
Vielleicht henn d kloine Baure uff dem Freiburger Bauredag joh ganz raffiniehrt blos d Däpp gschbiehld, abbr s siaht schoh so aus, als daß se doh am Kälbrschdrigg vorgfiehrd worre sin.

Ond d ällerbeschd Roll hätt sich dr Deifl gschnabbd. Wo dr Deifl blezzlich dr Griane schpiehld ond fiehr d Grünlandprämie isch, s oinzig grians Feigeblättle, was dr Künast noh bliebe isch, märkds koinr - ondr Deifl kriagd noh dr moischd Applaus ! Joh wo simmr denn ?

 

neuronales Netzwerk